1Pe 1 | KUD | STEP | Yau Pita Yeisu Besinana ana tauyewasa, teina yagu leta alimiyai, omiu Yaubada yana bodao ivesinuwaigomiu ta ammiya taumana vali dalava aidiyai, dova Ponita yo Galetiya yo Kapadosiya yo Esiya, yo hinage Bitiniya dalavadiyaone aidiyai.

1 Peter 1

Awayauwedo

1 Yau Pita Yeisu Besinana ana tauyewasa, teina yagu leta alimiyai, omiu Yaubada yana bodao ivesinuwaigomiu ta ammiya taumana vali dalava aidiyai, dova Ponita yo Galetiya yo Kapadosiya yo Esiya, yo hinage Bitiniya dalavadiyaone aidiyai. 2 Omiu mugai Yaubada inuwatuwuiyaꞌo ta ebeha ivesinuwaigomiu yana bodao, ainaena Aluꞌaluwa Veꞌahihiyena bada iꞌabiye maselegomiuꞌo neta Natuna ꞌwahinanaena, ta ebeha Yeisu Besinana amꞌawa abiyei.

Yaubada yana veꞌiꞌila yo yana nuwadaumwali himwalaꞌi alimiyai.

Yemidi Yeisu Besinana ainai

3 Yaubada tawalo vetuvehaeyei, iya yada Bada Yeisu Besinana Tamana, wuwuna iꞌatemuyamuyaegita mwalaꞌina, ta yada tubuiuyo vauvauna imohegita Yeisu Besinana yana towolouyo mwalowoiyena ainaena. Teina vehabana hauga maudoina tanuwatuwu avivini 4 ebeha ada velau galewai howola abo talobai. Tenem ainai yada dalava imwau iliꞌilimanidiꞌo vehabamiu, ta ebeha havena hipwahapwaha yo havena hiyabayababa yo havena hisawasawali. 5 Ebe Yaubada amyemidiyei mata yana wahiyalaena iꞌita avivinigomiu, ta hauga yana abaꞌovi ainai hava iꞌaꞌatububuniwa vehabamiu abo imohegomiu. 6 Ainaena amyaliyaya mwalaꞌina na hesi hauga iuꞌiuna teina ainai mata towoi vitaidi amlobalobaidi. 7 Teina aidiyena yami yemidi Yeisu ainai Yaubada itowotowoidi. Dova goula ainai alaꞌalahawawalinaena hitowotowoidi. Na hesi yami yemidi goula imwalaꞌi gabaei, wuwuna goula ginauli oviꞌovina. Ta ebe yami yemidi wahiwahiyalana hauga ilalaoma Yeisu Besinana yana mahalavama ainai, walo vetuvehae yo vewasawasa yo veꞌahihi amlobaidi. 8 Besinana iya nigele amyaꞌita, na hesi amveꞌilahi namwanamwa ainai, dova teina taꞌi nigele amyaꞌitaꞌita, na hesi ainai amyemidiꞌo, ta yami yaliyaya ainai mata nigele tayavahiliveꞌovi. 9 Wuwuna yami yemidi ainona bada ainai ammahalavaꞌo, neta aluꞌaluwamiu adi livahi.

10 Teina veꞌiꞌilane mugai tauwalo mahalavao hiwalo mahalavaei yo hibehaei ta livahine alidai hiwalo yemidiyenaꞌo ebeha Yaubada mata imohegita. 11 Na Besinana Aluꞌaluwana atediyai iveꞌitaedi ana muyao yo yana vewasawasa hauga mulitai vehabadi, na tauwalo mahalavao hanapu hibehabehaei aiteya hauga ainai abo livahine tenem imahalava. 12 Na Yaubada tauwalo mahalavao iveꞌitadi ebeha waloyemidi teina hiwalo mahalava mugaiyedi ebeha hiya vehabadi, na omiu hesi vehabamiu, ta ginauliwowa mugai vehabadi hiwawalowa bada teina, ambenalediꞌo, wasa namwanamwana ana tauwalo mahalavao aidiyena, neta Aluꞌaluwa Veꞌahihi galewaena yana wahiyalaena. Na ginauli teina namwanamwadi vehabadi mwalona hiwalowediꞌo alimiyai. Tausagenawasa galewai nuwanuwadi ebeha teina ginauliwone hinage hinapuidi.

Miya masemaselena

13 Ainaena ginauli teina vehabadi yami nuwatuwu maudoina amꞌabiye wahiyaladi, yo yami yemidi ammwau iliꞌilimanidi ta ebe haugana Yeisu Besinana imahalavama mata awanamwanamwa amlobai Yaubada ainaena. 14 Eeta Yaubada ainai amꞌawa abi na havena yami nuwatuwu dawaniwo hiloiloinaegomiu, dova mugai yami hauga nuwapwanopwano aidiyai. 15 Na hesi yami miya maudoidi masemaselena, dova ibom iyogaegomiu yana mumuga maselenaena. 16 Wuwuna Buki Veꞌahihi ainai iwalo, ‘Amꞌabiye maselegomiu, wuwuna yau masemaselegu.’

17 Howola abo Yaubada yana lauvetala dumwadumwaluna imahalava alidai ta iloinaegita yada paihowa namwanamwadi yo yababadi aidiyena. Yaubada ainai amꞌawanoi amwalo, ‘Tamamai’, eeta mayami veꞌahihi ammeheuhei yami miyamiya haugadi aidiyai, wuwuna omiu amiya taumana. 18 Mwalona tubumiyao yadi mumuga dova lagulagu amveveꞌaoꞌaonaedi na hesi Yaubada iyemaihagomiuꞌo. Na ami maiha neta bada amhanahanapui ebeha nigele ginauli oviꞌovidi, dova siliba yo goula. 19 Na hesi maihane Yaubada yana Lami ꞌwahinana ainaena iuwagomiu, neta iya Besinana namwanamwa alilina yo masemaselena. 20 Yaubada Besinana ivesinuwa mugaiyei yana paihowa teina vehabana, na mulitai baleꞌu iyeyemaselene, eeta teina hauga tuluhanai Besinananane imahalavamaꞌo ita vehabada. 21 Besinana ainaena Yaubada amyemidiyei neta ibom mwalowoiyena iꞌabiye towolouyoiyaꞌo na abamiya wasawasa ainai imwauwiyaꞌo, eeta yami yemidi yo yami nuwatuwu hae ammwau iliꞌilimanidi Yaubada ainai.

Tubuiuyo

22 Eeta amwaha dumwadumwaluna bada ammulitaei iliꞌilimani, ta ainaena yami masele amlobaiyaꞌo, yo hinage ami geluwo amveꞌilahi namwanamwaedi atemiu maudoina ainaena, eeta ilowoinanegomiu na amvelavelauyoigomiu tomowa ehebo ehebo aidiyai. 23 Na omiu bada hilabahiuyoigomiuꞌo, nigele tamamiyao mwalomwalowoidi aidiyena, na hesi Tamamiu yana walo na yawahina na miyamiya vateyaina ainaena. 24 Dova Buki Veꞌahihi yana walomahalava iwalo:

‘Tomowa maudoidi dova awahi,
na yadi wasawasa dova awahi tayadi.
Wuwuna awahi mata himwalowoi,
na tayadine hinage mata hiwelai yo hibeꞌu.
25 Na hesi Bada yana walo miyamiya vateyaina.’
Walone teina hauga alidai imiyamiya, neta wasa namwanamwana bada ambenalenaꞌo.